News / Meldungen        
Immer auf dem neuesten Stand...... bleiben Sie beim Dierker Brandschutz oHG.
An dieser Stelle präsentieren wir Ihnen unsere aktuellsten Mitteilungen. Es handelt sich dabei um Pressemitteilungen, Ankündigungen, Rückblicke, Berichte u.v.m. Wir wünschen Ihnen viel Spaß beim Studieren der Informationen.
 
De Wiehnachtsmann wull nich mehr!    29.12.2015
Nee, dach he, so geiht dat nich wieter. Dat heele Jahr weer he an`t Rackern un Ramentern, ook wenn de mehrsten Minschen dat villicht nich glöven wüllt. Man wat weer door allens to bedenken, wenn all överall op de Welt de Geschenken op`n Prick to Wiehnachten praat sein müssen! Wat weer door för´n Klamüüsern an`n Kalenner nödig! Wat müss doorför allens in de Reeg bröcht warrn! Nee un noch maal nee, fluuster de oole Keerl in sien rooden Kittel, so geiht dat nich wieter.

Över dat veele Geld wull he gaar nich snacken, wat he för dat Köpen un Inpacken un Transporteeren vun de veelen Geschenken utgeben müss. Un dat siene Lüüd jüst nich weel doorbi verdeenen kunnen, door wull he ook nich an denken. Ook in`t Himmelriek weer dat nich anners as op de Eer: Allerwegens mööt de mehrsten mit`n löckerigen Strump för de koolen Fööt tofreden sien.

Nee, wat den Wiehnachtsmann echt Sorgen mook, da weer heel un deel wat anners. He föhl dat nipp un nau, dat sien Bregen klöterig ward. Jümmers woller keem em`n Naam nich mehr in`n Kopp. He vergeet wichtige Opgaven, un oftins kunn he sik nich mehr door op besinnen, wat he jüst to een von de Engels seggt harr. Schulln se den gröönen Packen nu in de eene Eck von de groote Wulk afstellen, or harr he jüst wat anners kummandeert? He kunn sinneeren as man een, man dat bröch nix: He wüss dat eenfach nich mehr. All`n paarmaal har he wat lesen över de vermuckten Knütten mit düsse Demenz, de so veele Minschen Dag för Dag över`n Hals kummt. Se schüllt sik inrichten mit ehr Krankheit un sik nich bange moken laten, heet dat door. Haha, grummel de Wiehnachtsmann, dat schull em maal een vörmoken. He mark dat doch, dat se all över em grienen un dat se fluustern, of de Oole villicht happenhü weer. Un wat harrn so för`n Schaapsblick doorbi, wenn se achter em her luustern! De arme wunnerliche Keerl, dachen se över em – dat kunn he nipp un nau in ehr Jammer-Snuten lesen.

De Wiehnachtsmann arger sik un lamenteer un schimp över sien Vergeten, man opletz bleef ook för em bloots dat eene: He müss sik affinnen un müs door döör. Dat Leben harr sünnerliche Gesetzen, un de Bregen vun`n Minschen eerst recht. Lüüd, west vergnöögt, roop de Wiehnachtsmann luuthalsig, ook wenn Ji nich allens kriegen doot, wat Je geern hebben wüllt. De Wiehnachtsmann is ook bloots`n Minsch, un wenn sien Kopp em Maleschen mookt, denn mööt klooke Lüüd dat tareeren – ünnen op de Eer jüst so as baben in`n Heben.
 
 
Seite 1 von 18  1 2 3 4 ... 17 18       
 
  
http://www.dierker-brandschutz.de | Bremen, 25.02.2018 06:54